شرمولة رائعة لسمك السردين من الاخت ام الحبيبتين جزاها الله عنا كل خير
عمرني ما شفت راجلي كيدير حوت السردين مقلي ساندويش في الخبز وياكلو
حتى البارح نهار وماطال كيمشي للمطبخ ويحل الخبز ويدير وسطو السردين
مسكين ما قدرش يقاوم لذة السردين المقلي اللي درتو
وطبعا ما قلت ليه السّر ..
ومالو سوقو فشي سر ؟؟؟؟؟
السر خليتو لصحاباتي هما اللي خاصهم يعرفوه
شرمولة الحوت اللي ممكن تمشي مع اي حوت
لكن انا درتها مع السردين منزوع الشوك وحوتة ملاصقة مع حوتة
التحميرا
الابزار
الثموما 6 اضراس
الملح
الكمون شوية
مركز الطماطم
شوية ديال الحامض مصيّر
شوية زيت العود او الرومية
ربيع مكرد رقيق
واللي تحب الحرور تزيد شوية الهريسة
بطاطا خضرة واحدة او اكثر حسب كمية الحوت انا درت بطاطا واحدة في كيلو ديال السردين بطاطا محكوكة فالحكاكة رقيقة
نخلط كل العناصر مع بعضها ولا نظيف ابدا الماء لان الزيت اللي درناه سيساعد على خلط العناصر بالاظافة ان الماء كيمرّج الخليط وكيـبسْـلو
نديرو سردينة مفتوحة ونعمروها بشوية من الخليط ثم
نغلقها بسردينة اخرى ..ثم نفرغ ما تبقى من لخليط على ظهر السردين ونتركه يتشرب مزيان
وبعد مدة من الوقت
نمرغوها فالفورص ونقليها في زيت حام
ولكن في عافية مهيلة باش نخليوْ الفرصة
للبطاطا باش حتى هي تـُـقلى
اللذة ما نحكيش ليكم عليها
انتما اللي دوركم تحكيوْ ليَ
اما القيمة الغدائية ف عالية جدا
تنفع الصغار والكبار
تشكراتنا للاخت ام الحبيبتين جزاها الله عنا كل خير
شكرا بزاف أختاه
ردحذفchokran bzaaaaaaf akhti ana kaya3jabni sardin bzaf ozad ktar min jarabt charmola li 3titina llah ya3tik saha
ردحذفشوووكرا على هاد الفيكره غدي نجربها ومنقلش لراجلي شنو سر جزاك الله خيرا
ردحذف